Dünya çempionatının finalı ve İspaniyanın zəfəri, Polun kəhanətləri və onun 12 sentyabrda Türkiyədə keçiriləcək referendumda dəyərləndirmə yolları, Ərdoğanın terrorla mubarizə üçün özəl ordu qurulması haqdakı planları, ‘’A’’ romanı və Qaraqanın ilk radio müsahibəsi, casus böhranının gözlənilməz çözümü və Fridmanın məzuniyyətdən qayıtdıqdan sonra yazdığı ilk köşəsi. Bu qədər xəbər təəssüf ki, prezident Medevedevin sensasion, hətta inqilabi sayıla biləcək çıxışını kölgədə qoydu. Nə türk, nə də bizim mediamız bu hadisəyə demək olar ki, diqqət ayırmadı. Rusların özləri belə Medvedevin ölkəsinin xarici siyasətinin kif bağlamış təməllərini sarsıdan yeni istiqamətinə olduqca ehtiyatla yanaşdılar.

12 sentyabr 1982-ci il Konstitusiyasının qəbulundan düz 28 il sonra – yenə də 12 sentyabrda Türkiyə Anayasasına dəyişikliklər üçün referenduma gedir. Məqsəd 1982-ci il general Kənan Evren Konstitusiyasını dəyişmək, onun üzərindəki hərbiçilərin kölgəsini qaldırmaqdır. Təəssüf ki, iqtidardakı AK partiya ‘’hərbi xuntanın’’ diqtəsi altında hazırlanmış Anayasanın tamamını deyil, sadəcə bir-neçə maddəsini dəyişməyə təşəbbüs etdi. Halbuki, son iki seçkidən zəfərlə çıxan Ərdoğan höküməti Anayasanı tamamən dəyişdirib, tarixə keçə bilərdi. Rəcəb Tayyib Ərdoğan Anayasanın orasını-burasını dəyişdirib, yamaqlı boxça kimi qoydu xalqın önünə.